اكاديمية القوالب

989

بالصدفه كنت في مكتب تسويق عقاري في مدينه نصر وقابلت بنت مسئوله عن التسويق سنها في حدود سن ال23 سنه وخلصت دراستها الجامعيه وقدمت للحصول على الماجيستير من جامعه القاهره في كليه الاداب .. يشاء الله العلي القدير انها تتفشخر قدامي انها مستعجله علشان هيا تكريمها النهارده ومحتاجه تروح للكوافير بسرعه 

فالسؤال الطبيعي الي قلتهلها هتتكرمي فين؟ 

قالتلي بكل فخر هتكرم في معهد ناصر 

قلتلها هتتكرمي في معهد ناصر ليه هو انتي دكتوره؟ 

قالتلي لا مش معهد ناصر بتاع القلب انا هتكرم في اكاديميه ناصر العسكريه 

قلتلها الي في العجوزه؟ ردت بكل ثقه ايون

قلتلها انتي مجنده قالتلي لأ انا من الشباب المتميز الي حصل على دوره تدريبيه هناك والنهارده هتخرج بعد ما اخدت الكورس

طيب قلتلها بتدرسو ايه في الاكاديميه ؟

ردت بكل ثقه اننا بندرس ازاي نكون رجال دوله 

- يعني بتدرسوا ايه؟ اقتصاد؟ علوم سياسيه؟ تاريخ سياسي؟ نظم حكم؟ حكم رشيد؟ امن قومي؟ 

ردت بكل ارتباك اما حست اني ممكن اطلع فاهم "ايوا طبعا بندرس كل ده "

- طيب بتدرسوا المؤامره على مصر؟

ردت بتلعثم قالتلي ده الدراسه كلها عن الموضوع ده 

قلتلها حقيقي؟ طيب هل 25 يناير مؤامره ولا ثورة؟

ردت كما لو كانت تردد نشيد او قطعه محفوظات " وقالت هي حق يراد بيه باطل "

قلتلها ازاي؟ هل مبارك مكنش يستحق الثوره عليه؟ قالتلي ايوا طبعا كان يستحق

سالتها طيب هل مطالب الثوره مشروعه؟ قالتلي ايوا طبعا

قلتها هل الملايين الي نزلو 18 يوم كان كل دول متأمرين؟ قالتلي معظمهم

معقول في ملايين هيعملو مؤامره وهما ميعرفوش بعض؟ 

قالتلي ايوا

سالتها طيب المؤامره دي بدئت امتي ولصالح مين ؟

قالتلي بدئت من العدوان الثلاثي سنه 67 

قلتلها امتي؟ ردت بكل ثقه ان العدوان الثلاثي كان سنه 67 

سالتها مين الدول الي اعتدث ثلاثيا علينا سنه 67 ؟

قالتلي انجلترا وبريطانيا وامريكا 

قلتلها طيب واسرائيل؟ ردت وقالت ايوا طبعا واسرائيل

قلتلها يعني العدوان رباعي ولا ثلاثي؟

ردت وقالت هو ثلاثي بس اشترك فيه الاربعه دول 

سالتها طيب ايه هدف الدول دي من مؤامرتهم قالتلي اسقاط الدوله المصريه

برضه يعني ايه؟

قالتلي نبقي زي سوريا والعراق

قلتلها يعني هما بيتامرو علينا من 67 يعني من 60 سنه والي وقع هو سوريا والعراق؟

ردت وقالت بكل فخر علشان احنا عندنا جيش قوي 

قلتلها سلاح جيشنا القوي ده بنجيبه منين؟

قالتلي من امريكا 

طيب امريكا دي عدو ولا صديق؟ بتتامر علينا ولا بتدينا سلاح ومعونه؟

قالتلي طبعا عدو 

قلتلها طيب بناخد منها سلاح ليه؟

ومعونه عسكريه ليه؟

ومعونه اقتصاديه ليه؟

وبنبعت اوائل الجامعه ياخدو من عندها شهادات ليه؟

وسايبين سفارتها اساسا مفتوحه عندنا ليه؟

سكتت ثم سكتت 

قلتلها يا انسه العدوان الثلاثي كان 56 ضد انجلترا وفرنسا واسرائيل امريكا مكنتش طرف

وبريطانيا وانجلترا شئ واحد 

وياريت تلحقي تتحركي دلوقتي علشان تلحقي تتكرمي وسيتها ومشيت من مكتب التسويق 

من الي فات يتضح لينا ان الدوله جايه تهرج في الالفيه التالته

بتاخد شباب من قطاعات اجتماعيه وثقافيه مختلفه وبتغذي جواه كل هذا القدر من البلح 

وطبعا كل عنصر متدرب هيكون ولائه التام للقائد اللواء ابوسيفين الي عايش في دور محسن بيه ممتاز وكل متدرب فاكر نفسه رأفت الهجان وهو قاعد يبعت بالرسايل بالحبر السري او جمعه الشوان وهو بيشرب الكركديه مع صلاح قابيل 

واضح ان الفكره عجبت القاده وحسوا بتاثيرها الواسع في صناعه شويه القلل دي فقرروا يتوسعو في السبوبه ويعملوها اكاديميه للشباب يدخلها الشاب من هنا ويتشد على القالب كام اسبوع يطلع لامؤاخذه رجل دوله ميفرقش عن احمد موسى ومصطفي بكري او لامؤاخذه شريف اسماعيل او الزغلول الكبير عبدالعال 

السيسي يقود البلاد نحو نفس الخراب بنفس الخطوات الي مشى عليها زعيم الزعما ورمز الحريه البكباشي عبناصر يا حريه

تسجيل الايميل

شارك وفكر معانا وابعت تدوينتك