ومازال البحث مستمرا عن حبيب العادلي !!

343

من حوالي اكتر من عشرين يوم صدر حكم بحبس وزير داخلية مبارك حبيب العادلي ٧ سنين في ادانته في قضايا فساد ،،، ومن يومها اخبار تنزل تقول انه هرب واخبار تنزل تقول انه في بيته ولكن واضح جدا انه هرب لان كمان اتاكد عليه حكم الحبس ٧ سنين وهو محضرش ومحاميه قال انه " عيان ولا مؤاخذة "  وده خلاني احط جملة اعتراضية " احمد الخطيب عيان جدا وبنطلب افراج صحي له ولا حياة لمن تنادي " ،،،، نرجع لموضوعنا ان المحصلة واحدة وهي ان الداخلية مش عارفه تقبض علي حبيب العادلي ؟؟؟ واطرح سؤال كمان هل حبيب العادلي فوق القانون ؟؟؟ مش عارفه الصراحة هو ده سؤال والا اقرار حالة تنتهي بعلامة تعجب في اخر الجملة !!! 

الموضوع وصل ان وسط دوشة السوشيال ميديا تحول اختفاء حبيب العادلي لحالة من حالات الإختفاء القسري وطبعا ببوستات ساخرة لان الاختفاء القسري ليه ناسه ،،، وتجاهل تنفيذ القانون ليه ناسه برضه ،،، والناس مقامات في مصر ،،، وسلملي علي دولة القانون اللي علي الغلابة واللي ملهمش ظهر ،،،، 

ولسخرية القدر بقي الشباب الجدع اللي خرج من السجن بعد تقضية عقوبة ظالمة وعليه مراقبة عبثية لما بيتاخر ساعة عن المراقبة ولا عايز ياخد اذن يوم علشان شغل او جامعه او ولاده عيانه مبيعرفش والشباب دول عبره عن رايهم بكده بس يمكن تاهات تدويناتهم وسط الدوشة ،،،، مع انه اهم كلام واقرار لحالة القانون للغلابة والهروب للبلطجية ،،، 


وهنفضل نفكر ونفكر امته بلدنا فعلا هتبقي دولة قانون ومؤسسات ؟ امته هنبقي كلنا واحد قدام القضاء ؟؟؟ امته هنبطل نقول  اللي ملوش ظهر بيضرب علي قفا؟؟ امته ؟ امته ؟ امته هيقبضوا علي حبيب العادلي يا مصر!!؟!

تسجيل الايميل

شارك وفكر معانا وابعت تدوينتك