الانتحار للفت الانتباه

452


اه يا جماعه الناس بتنتحر عشان تلفت الانتباه، ايه مشكلتكم مع دا؟ ايوه في ناس كتير بتستخدم الانتحار لكسب تعاطف الآخرين، وفي ناس بتصور نفسها بمنتهي الجنون وهما بيقطعوا شراينهم عشان يكسبوا اهتمام او شهرة او انتباه..  في ناس بتعمل أكتر من كده عشان أسباب مش طبيعية وغريبة ومش مفهومه، و دا اكبر دليل انهم مرضى نفسيين يبحثوا عن المساعدة بأبشع الطرق.. دا أكبر دليل انهم محتاجين تعاطف وعلاج نفسي زيهم زيي مرض الاكتئاب الي في منهم بيعانوا في صمت، وفي منهم بيعاني بصوت عالي وهستيريا توصل لأنهم يصوروا لايف لانتحارهم.


هو لازم مريض الاكتئاب أو المريض النفسي يكون حابس نفسه في البيت ورافض يكلم مع اي حد وبيموت بالبطئ، عشان يبقا مريض فعلاً ويستاهل نتعاطف معاه.. لازم ينتحر بدون ما يقول عشان يموت فعلاً، وماحدش يلحقه، فا ساعتها هنصدق انه كان محتاج مساعدة بعد ما يكون طلع الروح خلاص؟ 


ما يمكن دا اخر أمل ليهم، الي يوصلهم انهم يدخلوا على السوشال ميديا يشاركوا الناس بـ مأساتهم في عز الوجع النفسي والجسدي الي بيمروا به وهما يأذوا نفسهم بنفسهم، وبمنتهي الهلع يصوروا الدم مغرق مكانهم وجسمهم ويقولوا انهم انتحروا ونهوا حياتهم بأيديهم.. دا أكيد نوع من أنواع الاضطراب العقلي والنفسي، و يمكن يكونوا بيعملوا كل دا عشان آخر شعراية أمل باقيه بيتعلقوا بيها، بيحاولوا يستنجدوا بأي حد.. بأي حل.. بأي مساعدة.. 


بعيداً عن قصه الدكتور مايكل هلال الي كل سوشال ميديا عرفتها وبعيداً عن تفاصيل قصته الي ممكن تكون اصلاً مختلفة عن الي بنكلم عليه، بس قبل مايكل في ناس كتير عملت كده.. في ناس كتير على المستوى الشخصي أعرفهم وعلي السوشال ميديا بيصوروا نفسهم وبيكتبوا بوستات تخض وتقلق، ونفضل ندور عليهم ونروح بيوتهم وشغلهم عشان نتأكد انه بوستاتهم دي مش هيكون نتيجتها الانتحار.


ايه المشكلة في اننا فعلاً نعملهم الي هما بيحاولوا يوصلوا له (الاهتمام) ونديهم فعلا شويه تركيز ومجهود ومحبه ونحاول ننصحهم بتأهيل نفسي.. هنخسر ايه ؟ ما هو دا الي هما محتاجينه فعلاً

الي يوصل شخص انه يأذي نفسه عشان بس ينال ويحصل على بعض الاهتمام والحب وتعاطف دا شخص بائس وتعبان ومريض يبحث عن أي مصدر أمان ومحبة، من أي حد. ويستاهل الدعم والتعاطف 

الناس دي محتاجة مساعدة نفسية زيهم زي اي مريض نفسي يتألم في الخفاء.. ليه معاناة الناس حجمها بيقل لما يتم الإعلان عنها؟ 

علي الأقل المريض الي تصرفاته مُعلنه بيكون في فرص ننقذه ونقدم له مساعده، مساعده بسيطه يعني مش هنخسر حاجة اما نتعاطف معاه وندفعه لطلب المساعدة والعلاج النفسي.


يمكن في ناس مريضة اكتئاب بتنتحر وبتموت في صمت حالتها أصعب بكتير من الحالات الي بتعلن عن انتحارها، وبعض الناس بيسموا الإعلان والتهديد بالإنتحار دا ابتزاز عاطفي، بس اياً كان المسميات والأسباب الي بتدفع المنتحر انه يستنجد بالناس ويكسب تعاطفهم، ففي الأول والاخر، الحالتين مرضى، المتألم في صمت مريض يحتاج لمساعدة واهتمام وتأهيل نفسي عاجل، والمتألم المعلن عن معاناته ومريض لجذب للاهتمام يحتاج ويستحق ايضاً المساعدة والاهتمام زيي أي مريض آخر.


تسجيل الايميل

شارك وفكر معانا وابعت تدوينتك