ليه الرجالة بتقول رأيها في التحرش!

372


‎انا بقالي فترة بحاول أدرك ليه الرجالة بتقول رأيها في التحرش؟ 

‎ليه كل شويه واحد يكتب بوست خمسين ألف سطر يقولنا فيه  تعريف التحرش كذا، وانه مسكة الايد مش تحرش، وأنه ساعات الستات بترجم الأفعال غلط، وانه مش كل الرجالة متحرشين، وانه الي بيدافع عن متحرش مش متحرش زيه لا دا راجل موضوعي وعاقل


‎يعني انتوا مين دخلكوا في تفاصيل الموضوع والقضية؟ بتقولوا رأيكوا بناءً علي ايه؟؟ بناءً علي تجارب مريتوا بيها مثلاً؟ بناءً علي تعرضكم للتحرش يومياً؟ بناءً علي انكم من ضمن ال٩٩.٩% ست مصرية الي بيتعرضوا للتحرش بشكل يومي؟ 

‎اكيد لا


‎نعم دعمك للقضية مهم لأنكم جزء من المجتمع، بس انتوا ياريت بضيفوا اي دعم أو إيجابية للقضية.. انتوا بتدخلوا في القضية بس عشان تقوموا بدور المحامين عن كل ذكر يشبهكم

‎ففي نهاية انتم غير مؤهلين ولا مدركين ل ربع الي بيحصل في المجتمع، او بشكل أوضح ب الي بيحصل في مجتمعنا، احنا، كستات 


‎انا اقدر اعرف المتحرش من اول نظره، ولو انا واختي (الي بمناسبه مختلفين في الطباع والاهتمامات والأفكار تماماً) قاعدين في مكان واحد وفي شخص في القاعدة دي متحرش منحط، بنعرفه احنا الاتنين، وأما بنشارك بعض بوجهه نظرنا بتطلع متشابهة وشعورنا واسبابنا واحدة (النظرات، طريقة الكلام، لغة جسده..الخ)


وساعات كتير ستات بتتعرض لتحرش مش واضح بشكل قوي لحضرتك كراجل، فالست بتقرر انها مش هتتكلم عشان هتتسأل اسئله ملهاش اجابه وهتبدو في الظاهر انها اساءت الحكم او ظلمت الراجل، ويا هتتهم أنها بترمي بلاها علي الراجل (الذي هو شئ نادر حدوثه في مصر لانه الست في غني عن الوصم والبهدله الي هتحصلها وهتقابلها اما تتهم راجل بالتحرش) يا هيعترض الاغلبيه بحجه انه دا مش تحرش دا بس غشوميه (واحد ضرب واحده فأشطه دا عنف لكن مش تحرش) او عشم (اصل انتوا صحاب وهو بيعتبرلك زيي اخته.. صديقته.. بنته.. امه..) او هيقولوا انه دا اختلاف ثقافات (اصل المتحرش عايش بره وبيسافر كتير فا متعود علي التلامس)


بس في الحقيقة حتي لو التحرش بالنسبه لحضرتك مش واضح وكان مجرد لمسه ايد او كتف او نص حضن فكل دا يعتبر تحرش مادام انا موفقتش عليه ومادام متسألتش قبلها اذا كنت موافقه علي دا ولا لا، وحتي لو الموضوع بسيط في نظرك وحتي لو المتحرش عمل حاجه اقل حتي من لمسه الايد فا أحنا كستات عندنا نوع من القدرات الخارقة الي صعب تفهمها كذكر في اننا نعرف دا متحرش ولا لا، نتيجة انه كل واحده فينا عاشت حياتها كلها بتتعرض للتحرش بأنواعه وأشكاله المختلفة الي انت برضه متعرفش عنها حاجة فا اه احنا بس الي نقدر نحكم فلان دا متحرش ولا لا، والضحية بس هي الي من حقها تحدد الي حصل دا تحرش ولا سوء تفاهم ولا عفوية ولا.. ولا..


‎وكل المسميات الملونة الي بتختاروها عشان تبعدوا بأي طريقة عن مصطلح ''التحرش'' وتقللوا من الي تعرضت له الضحية فا كلها مسميات ظالمة وبتسلب حق الضحية في تصنيف الفعل الي اتعرضت له بأنه تحرش، اللي برضه لا انت ولا غيرك من حقكوا تاخدوا الحق دا منها

 

مفيش راجل من حقه يقلل من جريمة التحرش لأنه لم يمر بهذه التجربة، فأكيد مش هيفهم الي بيحصلنا، الا لو حاول يتثقف ويزيد من وعيه بالقضية يمكن ساعتها يدرك حجم الأزمة، ولكن برضه مش هيدرك الشعور والأذي النفسي الي بيحصل للست لما بينتهك جزء من جسمها.

 نعم، الحياة غير عادلة لجميع المواطنين في مصر، لكن الحياة أكثر ظلماً واضطهادً للمرأة.. فأتمنى أن تحتفظ جميع الرجال ب آرائها لنفسها الا وأن كنت ستضيف شيئاً إيجابياً للقضية.غير ذلك فأتركوا مهمة الجلد لباقي المجتمع لانه بالفعل بيقوم بيها بشكل جيد لأي ست تقرر تثور علي الظلم وتطلب بحقها، والرجاله كده كده مش محتاجين محامين يدفعوا عنهم في قضية التحرش بالذات.


تسجيل الايميل

شارك وفكر معانا وابعت تدوينتك