عملتوا ايه بالتفويض ؟؟

903


في الذكرى الرابعة لتفويض نظام 30 يونيو بمكافحة الإرهاب أظن حان الوقت إننا نحاسبه على إيه اللي عمله بالتفويض. بغض النظر عن إن فكرة انك تطالب بتفويض شعبي بإنك تعمل مهامك اللي هي شغلك الطبيعي فكرة غريبة أصلا, وبغض النظر عن فكرة إنك تطلب التفويض ده في مظاهرة شعبية وإنت كنظام ضد فكرة المظاهرات أصلا وأول قراراتك كانت قانون المظاهرات, فخلينا نتغاضى عن كل ده ونعتبر التفويض أمر واقع وخلينا نتحاسب بقى. 


بالرغم إن التفويض ده مكانش واضح المعالم ومكانش فيه أي بنود مكتوبة بس هنفترض بحسب فهمنا إنك بالتفويض ده هتخلي مكافحة الإرهاب هي أولويات الدولة على حساب أي حاجة تاني. يعني أنت بتطالب الشعب إنه يتنازل عن حاجات أساسية في مقابل التخلص من الإرهاب, طيب خلينا نشوف الشعب اتنازل عن ايه والنتيجة ايه. 


بالتفويض ده أنت حولت أولويات الدولة للتسليح عشان تقضي على الإرهاب, وأول الأولويات دي هي الاقتصاد. فأنت بالتفويض ده سحبت ميزانية الدولة اللي مخصصة لمشاريع وبنية أساسية ووجهتها لشراء أسلحة ورفع كفاءة الجيش والشرطة. وبما إنك ما عندكش فلوس كتير فأنت قررت تقترض من برة عشان تشتري سلاح. نتيجة الكلام ده الطبيعية كانت طبعا انهيار العملة اللي اضطرتك للتعويم. يعني بدل ما تاخد فلوس تشغلها في مشرايع ومصانع رحت اشتريت بيها تسليح وطيارات عشان تحارب الإرهاب وانت مش عارف انك بكدة كسرت دايرة الاقتصاد وخرجت الفلوس اللي المفروض تستثمرها وجمدتها وخرجتها برة الدايرة. طيب هل قبل ما تعمل كدة شرحت للناس إن بالتفويض ده التمن هيكون إن مرتبهم هينزل النص وإن مصاريفهم اليومية هتزيد الضعف؟ هل هما فوضوك وهما مدركين كدة؟ 


كمان لما تصرف مصاريف مهولة على مشروع زي قناة السويس الجديدة اللي أي حد بيفهم عارف إنه مش هيجيب فلوس, وبحسب التقرير الأخير للبنك المركزي المصري قناة السويس بتخسر, طيب هل ده كان من ضمن التفويض؟ يعني دلوقت نحابسك إزاي على اهدار الفلوس دي كلها من غير دراسة؟ 



تاني حاجة الناس اتنازلت عنها في مقابل مكافحة الإرهاب هي حقوقهم الأساسية والحريات العامة. يعني الاعتقالات العشوائية والاختفاء القسري والقتل خارج نطاق القانون بقى بيمارس بشكل منهجي في إطار مكافحة الإرهاب والمفروض الناس ترضى بكدة. طيب فيه ناس راضية بكدة عشان مقتنعة إن ده مش هيحصلها طالما هي ماشية جنب الحيط. بس ايه اللي يضمن إن مافيش بريء يتعرض لده؟ هل فيه أي درجة من درجات الشفافية والمراقبة عشان نعرف إن العملية دي ماشية حسب القانون؟ ولا التفويض معناه التغاضي عن تطبيق القانون كمان؟ لا ما احنا عايزين نعرف. 


طيب دلوقت بالنسبة للطبقة المتعلمة واللي هي بتحب تمارس حريتها في العبير والانتقاد والمحاسبة, دول هيتم التنكيل بيهم واخراسهم بحجة مكافحة الإرهاب, هل ده كان من ضمن التفويض بردو؟ 


ثالثا, دلوقت لو إحنا معترضين على الأداء الأمني في مكافحة الإرهاب, هل التفويض ده يدينا الحق نتكلم ونعترض أو نبدي رأينا. يعني مثلا أنا شايف إنكم بتتعاملوا مع جريمة الإرهاب بشكل غلط خالص. يعني انتوا عشان خلفيتكم عسكرية مش جنائية فبتتعاملوا مع الإرهابي على إنه عدو صريح مش على إنه مجرم, فبدل ما تعملوا تحقيقات جنائية حقيقية بعد كل جريمة عشان تكشفوا الفاعل, لا بتتعاملوا بشكل عسكري في أنكم تاخدوا إجراءات إنتقامية في إنكم تضربوا ضربات عسكرية لأماكن بتعتقدوا انها أوكار الإرهاب بغض النظر عن هل هما دول اللي عملوا العملية الإرهابية ولا لا. التوجه ده في الآخر نتيجته إن اللي عمل العملية الإرهابية لسة حر طليق وممكن يعمل عملية تانية وتالتة ورابعة وهو مطمن إنكم هتروحوا تضربوا حتة في الصحرا بدل ما تمسكوه شخصيا.  


المهم دلوقت إحنا عايزين نتحاسب, لأنه ببساطة بعد أربع سنين الإرهاب لسة موجود ومش بيضعف وبينفذ عمليات كبيرة وخطيرة ضد عسكريين ومدنيين سواء في مواقع عسكرية في سيناء أو في قلب العاصمة والمدن الكبيرة. يعني دلوقت بعد ما أتنازلنا عن الاقتصاد واتفقرنا واتنازلنا عن حقوقنا وحرياتنا وحقنا في الانتقاد الخ الخ, كل ده في الاخر ومش شايفين أي نتيجة. إزاي بقى نحاسبكم على سوء استخدام التفويض؟ إزاي نضمن إن استمرار سياساتكم مش هيكمل في نفس السكة اللي مافيهاش أي نتيجة؟ يعني دلوقت بعد ما اتنازلنا عن حقنا في الكلام والانتقاد, إزاي نحاسبكم؟ 


تسجيل الايميل

شارك وفكر معانا وابعت تدوينتك