مرثية الثوار .. شعر

568


مع كل طلعة شمس

سارينة إسعاف تفوت

وسع طريق يا مواطن

معانا وطن بيموت

وسع طريق للجاي

الجاي مش لينا

حكم الغراب في الحي

وعسكر مراسينا

خلى الفراق عادة

خلى الوجع مينا

كل الحاجات متعادة

بما فيها أسامينا

الأولة خالد

والتانية مينا

والتالتة شيماء

والرابعة سينا

والخامسة تذكرة

والسادسة نسينا

الدم في المجزرة

بالعار بيكسينا

والسابعة قربي

يا باقي مآسينا

وياللي واسيت النبي

لاجل النبي تواسينا

******

تقل خطاك يا حبر

الجرح بقى واعر

نجيب منين الصبر

واللي انجرح شاعر

من هنا فات حلمنا

وهنا الوطن غناله

وهناك كان عسكري

نشن في أوصاله

شاله الوطن على كفه

غناله من تاني

رجع الشهيد صفه

يغني لشهيد تاني

وع الناصية واقع ولد

مخنوق من الدخان

تحضن أنينه البلد

وتتحامى بالميدان

هتف الولد يسقط

يسقط حسين وعنان

هتفت وراه البلد

يسقط جميع من خان

يسقط جميع من خاف

يسقط جميع شاف

يسقط جميع من حكم

بالجهل والنبوت

وسع طريق يا مواطن

معانا وطن بيموت

******

وسع طريق للثورة

الثورة واقفة طابور

عيالها في المعتقل

وهي رايحة تزور

على راسها شايلة الهم

شايلة كتب وفطور

بتفتش إيه يا عم

ملعون أبوك مأمور

يا سجن واسمك وطن

يا وطن ساكن قصور

مستني تطرح إيه

وأنت غيطانك بور

الأولة دومة

والتانية ماهينور

شعبك في سابع نومة

طفي يا مصر النور

والتالتة عواد

يهتف بعلو السور

عرضوا الوطن في مزاد

باعوا البشر والدور

والرابعة شوكان

وكل اللي مش مشهور

كل اللي مصري مدان

مكتوبة على الباسبور

والخامسة يا علاء

اكتب وغني وثور

المجد للسجناء

والخزي للدستور

والسادسة العقرب

والمزرعة والطور

كل السجون أقرب

والسجن للجمهور

والسابعة ضمي

وعدي السنين يا شهور

مشتاق لحضن أمي

إمتى يا سجن تغور

*****

ماتخافش من غربتك

ياما في البعاد قربة

خاف لو تعود للوطن

تلقى الوطن غربة

كنا رفاقة كتير

وكان الميدان بيتنا

يسمع غنانا الطير

والشمس حبتنا

تصحى على صوتنا

وتنزل على خيامنا

والمغربية تفوتنا

بنعزل في حكامنا

فجأة الهتاف اتكسر

راح فين ميدان الأمس

لا رفاقة ليهم أثر

ولا يومها طلعت شمس

ورجعوا اللصوص تاني

رجعوا بسادات تاني

صلى بجماعة جماعة

ولف الميدان في تابوت

وسع طريق يا مواطن

معانا وطن بيموت

******

وسع طريق للجدع

وحاسب من الحراس

صالة السفر يا وجع

من إمتى كنتي خلاص؟!

من يوم ما ضل الوطن

وصدق البصاص

واستهوى ريحة العطن

وفرعن الأنصاص

دم الشهيد يا مدد

يا سورة الإخلاص

زاد المسيرة نفد

والموت هنا قصاص

الأولة فارس

والتانية القصاص

في البدء كان مارس

لما انطفى النبراس

والتالتة خالد

إهتف وقول يا قصاص

دم القضاء بارد

بيبرأ القناص

والرابعة يا مدارس

سكي الفصول ما خلاص

جبنا الشاويش حارس

زرع وادينا رصاص

والخامسة يا مغيث

من فتنة الخناس

داعش جنود إبليس

حوش عن آذاهم الناس

والسادسة دوار

غضب الشعوب يا كاس

على كل حاكم جار

وسيس الأجراس

والسابعة يا دير

قوم كمل القداس

عمر السلام والخير

ما وهبهم النخاس

*******

لموا الكتب يا خوجات

كل العيال غايبة

مش باقي غير خو_ات

صابغين شعور شايبة

مش باقي غير ظابط

على كتفه دبورة

على صدرنا مرابط

لوحده في الصورة

إيه يعمل التعليم

لو الوطن منهار

يبني الوطن يا بهيم

ويجيب له ألف نهار

آه يا زمن مندار

الجهل فيك حاكم

تعالجنا بالممبار

والفكر يتحاكم

مش باقي غير نعشي

وكلابش على إيدي

كل أما أقول أمشي

يا بلادي بتقيدي

وتزيدي أحزاني

فارجعلك ألقاني

مقتول في زنزانتي

وطالعة فوقي بيوت

وسع طريق يا مواطن

معانا وطن بيموت

تسجيل الايميل

شارك وفكر معانا وابعت تدوينتك