هقاطع أي انتخابات .. لأنها باطلة

580


باطله علشان انا واحده من الهبل اللي نزلوا في ٣٠ /٦  علشان التفويض علي اساس ان هيكون فيه ديمقراطية و الاخوان هيسيبوا الحكم بسلام زي ما الريس   و الحكومه ساعتها وعدوا لكن النتيجه كانت فض رابعه بطريقه بشعه أدت اني فقدت اخويا اغلي الناس ليا مات بمنتهي الوحشيه و هو لا كان معاه سلاح ولا غيره ولا حتي كان ماشي في مظاهرات كان رايح يدور علي صاحبه و العصر اذن دخل يصلي و هو طالع قعد علي الرصيف يربط الكوتشي اخدت ٣ رصاصات 

٣ رصاصات كده عاطل في باطل شاب ٣٥ سنه اولاده اتيتموا من لا شيء 

بعدها ادركت ان كل اللي بيحصل في البلد مصالح شخصيه مش لمصلحه البلد ولا نيله و اي حد علي اتم الاستعداد يدوس علي الشعب بحاله علشان يوصل ينهبله كام مليار .. طب و الناس اللي ماتت و اللي لسه بتموت !! 

مش مهم الشعب ٩٠ مليون ايه يعني مليون ولا اتنين ولا حته عشره يموتوا عادي 

مش هصوت في الانتخابات علشان الموت دلوقتي مبقاش بالرصاص و الحرق 

الموت دلوقتي بقي ابشع كتير 

الموت بقي سجن و اعتقالات لناس لا ليها في الطور ولا في الطحين 

الموت بقي الأسعار المولعه الناس بقت تموت من الجوع و القهر علشان نفسهم يجيبوا لعيالهم طقم يفرحوا بي في العيد و مش عارفين 

مش هصوت ولا هنتخب في بلد كلها باطل في باطل 

انا ضد اي انتخابات او تعديلات من ٢٠١٣ انا و كل اهلي أخدنا القرار دا 

تحرم علينا كل لجان الانتخابات اللي جت بالدم

تسجيل الايميل

شارك وفكر معانا وابعت تدوينتك