خرافات

430

مين فينا ماتقالوش خرافات كتير من و هو صغير عن جسمه مين فين مسألش أهله هو جه ازاى وحكوله حكايات غريبه واما كبر عرف انها غلط!

مين فينا اهله فهموه يعنى ايه بلوغ !

طب يعمل ايه فى فترة المراهقه!

مين فينا عرف اسم اعضاؤه الجنسيه « التناسليه »و دورها وهو صغير ! الخرافات سبب فى مشاكل نفسيه كتير بتحصلنا 

عشان كده حبيت اعمل حمله نكتب فيها عن كل الخرافات اللى اتقالتلنا من و احنا صغيرين ،عن كل اللى صدقناه واكتشفنا انه غلط لما كبرنا، عن كل اللى بنتمنى انه مش يتقال تانى لاى طفل ولا لاى مراهق 


"اول الخرافات اللى هكتب عنها هى خرافات  البريود  "انتى نجسه

دى اكتر كلمه اتقالتلنا كبنات من اول ما بلغنا  و جتلنا البريود « الدورة الشهريه»  ومن وقتها بقي محرم علينا حاجات كتير و بيتقالنا كلام كتير مش مفهوم و مش معروف اصله ايه ، و دايما كنت بسأل هو ايه  اساسه وايه اصل حكايته ! بس ولا مرة حد جاوب عليا و قالى انا ليه نجسه  ولا قالولى اى رد مقنع  كان بيتقالنا انتى عندك البريود تبقي نجسه وبالتالى 

  مينفعش ندخل على واحده لسه والده عشان منكبسهاش و طبعا لو سألت اى حد نكبسها ازاى يقولك اسمعى الكلام اصلك انتى دلوقت نجسه

و كمان مدخلش لعروسه متجوزة  جديد بيتها عشان  هخليها متخلفش ،ومتبقاش فاهم ايه دخل ش

و كمان مدخلش على ميت عشان ميدخلش النار بسبب البريود بتاعتنا 

وكمان مدخلش على وحده لسه والده عشان اللبن ميقطعش ومش هتعرف ترضع بسببي

و كمان معديش فوق حد نايم عشان جسمه ميتكسرش ،وكأن البريود دى بولدوزر 

و طبعا من اهم الحاجات والمقولات المأثورة ان يقولولنا وان عندنا البريود بيبقي ضهرنا مفتوح 

مفتوح ازاى ! ده سؤال مالوش اى اجابه 

و بما ان ضهرنا مفتوح بسبب البريود يبقي مينفعش نستحمى و لا نشرب اى مشروبات سخنه 

ارتبطت البريود فحياتنا بالنجاسه و احساس بالخجل و النقص لسنين طويله، لكن لما كبرت وقريت واتعلمت اكتر عرفت ان كل دى خرافات و ملهاش اى اساس من الصحه 


شاركوا في حمله خرافات واكتبو عن الخرافات اللى اتقالتلكوا وازاى عرفتوا انها خرافه و واجهتوها ازاى وشاركوا في التدوين علي  هاشتاج #خرافات

تسجيل الايميل

شارك وفكر معانا وابعت تدوينتك