أم روح حلوة

544


في بنت اسمها إسراء أحمد اتخلقت بوجه وشكل مختلف عن باقي الخليقة

إسراء حاولت تعيش حياة عادية وبدأت تستخدم السوشيال ميديا عشان تعبر عن استيائها من التنمر اللي بتتعرضله بسبب شكلها.. ناس كتير لطيفه دخلت دعمتها وهونت علي قلبها بكلمات طيبة وجميلة 


مع الوقت إسراء اتحولت لشخص بابلك فيجر علي السوشيال ميديا.. زيي شادي سرور ونورهان (نفيسه بكوغتي) والأسماء الكتير اللي فعلياً لم يقدموا شئ للمجتمع او العامة ومع ذلك نالوا قدر واسع من الفلوس والشهرة غير مفهوم وغير مستحق. 


إسراء حالياً هتنزل كتاب اسمه "روح حلوه"  - كما تطلق علي نفسها دائماً- 


ناس كتير معترضه علي اللي إسراء بتعمله ووصفوا بـ "التسول الشيك" وناس تانيه شايفين انه دي فرصه للبنت عشان تنجح وتجيب فلوس لأنه مفيش مكان في مصر هيقبل يشغلها ويديها وظيفة نظراً لأننا مجتمع عنصري وأول حاجة هيبصوا عليها هي شكلها ووجهها المختلف فا بالتالي فرصة الكتابة والنشر هتكون مفيدة ومربحة ليها لأنها عندها دعم كبير على السوشال ميديا.. 


إسراء بتطالب انه المجتمع يعاملها بشكل طبيعي زيها زي اي حد في سنها.. دا شئ لطيف ومن حقها تماماً..

بس إسراء نفسها مبتعاملش نفسها طبيعي.. هي طول الوقت طالبة من الناس تعاطف زيادة، مساعدة ودعم زيادة، تصقيف زيادة، اشفاق وطبطبه زيادة.. مبتحاولش تسعى او تتقدم بالشكل "الطبيعي" اللي هي بتطالب به.. لو فعلياً هي عايزه تعيش حياة طبيعية، تنزل تدرس.. تجتهد.. تتعلم..  تفرض نفسها علي المجتمع من خلال أفعال طبيعية تعملها بنفسها

تخلي المجتمع يعترف بيها من خلال نجاح ملحوظ يجبر الناس والمجتمع انهم يكلموا عنها، زيي ما ناس كتير بره مصر بيعملوا دا


لكن فكرة اني استخبى ورا سوشال ميديا وأفضل ليل ونهار اكتب بوستات عن اني بحب نفسي وانه ربنا اخد مني الجمال لكن أنعم عليا بروح حلوه، دا شئ سئ جدا ومش في صالحها ولا بيصب علي اللي هي بتحاول تثبته وتوصله (الحياة الطبيعية) 

إسراء حالياً متفرفش حاجة عن ياسمين الخطيب وسما المصري، وستات زيهم كتير، بيتاجروا بشكلهم عشان يتشهروا في حين انهم لا عندهم ثقافة كفاية ولا علم كفاية يخليهم يستحقوا الشهرة.. إسراء كمان بتاجر بشكلها والتنمر الي بتتعرضله عشان تكسب تعاطف الناس للحصول على الشهرة 


طبعاً مدركين انه المجتمع ظالم وصعب مواجهته في ظل التنمر والوقاحة الي هتتعرض لها إسراء لو نزلت وسعت في أرض الواقع.. لكن لو دا اللي هي عايزاه فعلاً (نجاح وعيشه طبيعية) فأتمنى انها تجازف وتجرب تتحرك خطوات مهمة أكاديمية وعلمية الناس تشهد بيها وتاخدها قدوة..

عايزه تكتب كتاب وتبقا أدبية عظيمة.. تنزل وتتعلم أدب ومهارات اللغه، والتأليف والدراما، وتقرأ كتب وتكبر نفسها وعقلها وخزينها الأدبي والعلمي وبعدها تبدأ تكتب وتنشر وتخلي العالم يشهد انها فعلاً اتحدت اختلافها اللي المجتمع مش قابله، وعملت كتاب عظيم يستحق القراءة والشراء.. وساعتها هتاجر برضه للحصول على الشهرة بس هتاجر بثقافتها وعلمها وهتحصل علي شهرة برضه بس شهرة عن استحقاق حقيقي. 



تسجيل الايميل

شارك وفكر معانا وابعت تدوينتك