مع العلم"انا مخطوبة"

405

مع العلم"انا مخطوبة"

في واحد من جروبات البنات على الفيس بوك، بنت كتبت بوست عن التهاب أصابها بشكل مفاجئ فى عينيها، و انها مش قادره تستنى تروح لدكتور، و بتسأل عن وسيلة لتخفيف الألم، ختمت كلامها بجملة مالهاش اي علاقة بسياق الكلام وقالت مع العلم"انا مخطوبة".


كنت منتظره اقرا باقي الجمله، ان خطيبها هيزورها، او ان عندهم مناسبه وهيخرجوا مثلا، بس للأسف، ماكنش فى اكتر من الجمله دي، كأنها بتحط شوية بقدونس على صينية كيك.


البوست جمع فوق الألفين ريأكت ساخر، و اكتر منهم تعليقات، عن ايه علاقة ده بالموضوع، ناس بتسأل فين باقي البوست، وناس بتتنمر، وناس بتشتم، وناس بتسخر بشكل مهين.


الموضوع بدأ يتكرر قدامي بشكل ملحوظ، وبدأت ادور عند كل البنات كان العامل المشترك بينهم هو حبيبة/خطيبة/زوجة/مرآة فلان، مافيش واحده عندها أي حاجه خاصه بشخصيتها هي.


البنات دي ضحية كلام الطنطات، و الهراء المجتمعي، و حصر حياتنا فى الدبله، و الغاء أهميتنا كأنسان لو مقدرناش نحقق تارجت العيله و نتخطب قبل فلانه و نتجوز قبل بنات العيله، وده بقا المقياس الوحيد لنجاحنا، حتى لو فشلنا فى حياتنا كلها.


طول الوقت بنتحط كبنات تحت ضغط يالا عاوزين نفرح بيكي، محدش قالنا عاوزينكم تفرحوا، فبنلاقي نفسنا بنتنازل عن أحلامنا، و بنحس اننا ملناش أي قيمه وسط دوايرنا إلا أما نحقق الأنجاز ولبس الدبله فى الأنجاز.


اللى عاوزه أقوله أن البنات دي معندناش اي حاجه فى حياتها الا خطيبها، اللى رحمها من الأسئلة السخيفه بتاعت مافيش حاجه جايه فى السكه، فرفقا بهم و منحاولش نضايقهم، لانهم يستحقوا التعاطف و التضامن، لانهم ببساطه ضحية.

تسجيل الايميل

شارك وفكر معانا وابعت تدوينتك