بطلات مصر يستحقن التشجيع

278

في ظل خيبة الأمل الناتجة عن خسارة منتخب كرة القدم المصري في كأس العالم، كانت ستات مصر بتحرز عدد مهول وقياسي من الميداليات والمراكز في دورة ألعاب البحر المتوسط بأسبانيا، لكن مفيش عدد كبير سمع عنهم، أو على الأقل لم ينالوا قدرًا من شهرة، مثلما تنال رياضة زي رياضة كرة القدم اللي مشوفناش منها أي انتصارات مؤخراً تفرح الشعب. 

ويمكن سبب عدم اهتمام الإعلام بنقل صورة حية لنجاح هؤلاء النساء، مش إنهم نساء، أعتقد (على عكس العادي)، لكن يمكن لأنهم بيلعبوا ألعاب ملهاش متابعين أو مشاهدين كتير، وألعاب معظمها فردية فبالتالي مش هيجيبوا إعلانات وفلوس للقناة، أو أيًا كانت الجهة زي ما كرة القدم بتجيب.

ولو أن إذا اهتمينا شوية بتسليط الأضواء عليهم وإعطائهم ما يستحقن من تعظيم، يمكن ساعتها يتشهروا بشكل كافي يجعل منهم نماذج يحتذى بيها ومثال يشرف للبلد وساعتها هيجبوا إعلانات ومشاهدات برضو لأنه ناس هتعرفهم وهيعرفوا إنهم هما كمان يستحقوا كل الدعم والتشجيع وبقدر يمكن أكبر مما يستحقه المنتخب اللي بيقبض ملايين لا حصر لها وفي الآخر بيخسر رغم كل الدعم والتشجيع والمصاريف اللي بتتصرف من البلد لأجل تسخير راحة اللعيبة وتدريبهم، على الأقل هؤلاء النساء مبيخدوش حاجة من البلد وبيدخلوا بطولهم وكأفراد للمسابقات دي وبيبذلوا قصارى جهدهم وبيفوزوا بدون ما يتصرف عليهم ملايين ولا هما ولا جهاز فني ولا فريق كامل، بل بالعكس في بعض الأحيان أشخاص منهم بيدفعوا الآلاف طوال السنة للمدربين والنوادي عشان يدربوا فيها.

المهم.. والأهم إليكم بعض من أسماء البطلات، وما حصلوا عليه من ميداليات في دورة ألعاب البحر المتوسط بإسبانيا:

فريدة عثمان: حصلت على 3 ميداليات خلال دورة ألعاب المتوسط المقامة فى إسبانيا, 2 ذهبية في سباق 50 متر سباحة حرة, وفي سباق 50 متير فراشة, و 1 فضية في سباق 100 متر فراشة. 

سارة سمير: حصلت على ميداليتين ذهبيتين, واحدة في منافسات الخطف لوزن 69 كجم برفع ثقل 105 كجم, وأخرى في مسابقة النطر. 

نانسي طمان: حصلت على ذهبية في نهائيات جهاز حصان القفز للجمباز الفني آنسات.

دينا مشرف: حصلت على ذهبية وهزمت بطلة موناكو 4-1 في تنس الطاولة.

سمر حمزة: حصلت على ميدالية برونزية بعد أن هزمت بطلة إسبانيا 10-0 في المصارعة لوزن 68 كجم. 

دينا بركات: حصلت على برونزية النطر في رفع الأثقال لوزن 75 كجم.

هدايا ملاك: حصلت على ميدالية برونزية في التايكوندو لوزن 67 كجم.

رضوي سيد: حصلت على ميدالية الفضية في منافسات التايكوندو وزن 58 كجم.

جيانا فاروق: حصلت على ميدالية فضية بالكاراتيه بوزن  61 كجم.

وحصلت كل من, أريج سعيد, عفاف الهدهد, وهبه صلاح: على البرونزية, في الكاراتيه, مسدس الرماية, ورفع الاثقال.


تسجيل الايميل

شارك وفكر معانا وابعت تدوينتك