شجع مصر

357

خبر جميل عرفناه من شوية وهو فوز مصر بتنظيم بطولة كأس الامم الافريقية ، البطولة الي احنا اكتر بلد في افريقيا كسبناها واخر مرة كانت في ٢٠١٠ بعد ما حققنا ثلاثية تاريخية اكدت اننا أسياد افريقيا لتلات دورات متتالية ٢٠٠٦ ، ٢٠٠٨ ، ٢٠٠١٠


بعدين غيبنا ٣ دورات متتالية متأهلناش اساسا الي ان عدنا اخر دورة في الجابون ووصلنا للنهائي وخسرنا امام الكاميرون ٢-١ 


الكاميرون كان المفروض هي من سينظم البطولةلكن الاتحاد الافريقي سحب التنظيم لتأخر في تنفيذ البنية الرياضية اللازمه وتقدمت مصر في خطوة مهمة وجريئة جدا ولكنها ضرورية 


التنافس علي الاستضافة مع بلد مستقرة سياسيا واقتصاديا زي جنوب افريقيا خلا الامر بالغ الصعوبة لان مصر بتلعب الدوري المحلي بدون جمهور فكيف ستستضيف مئات الالاف وهل هتنجح في التنظيم في الوقت الصغير ده؟!


مطلوب تنظيم الحجز الالكتروني للتذاكر والمقاعد وبوابات دخول المشجعين الي تخلي الملعب يتملى خلال ٤٠ دقيقة ويتم اخلاءة خلال ٢٠ دقيقه زي ما بنشوف في اوروبا والخدمات جوا الملعب حمامات ومطاعم ونظافة وشبكه الطرق والمترو والفنادق والمطارات 

البطوله هتكون في القاهرة والاسكندرية وبورسعيد والاسماعيلية يعني كل الي بقوله ده لازم يكون جاهز في كل المحافظات مش بس العاصمة 


كل دي اسألة اجابتها عندنا كلنا ، شعب وحكومة ، نظام ومعارضة ، أمن وإعلام ، شباب ومنظمين 


ياسلام لما ننظم البطولة دي وكمان نفوز بيها 🙏🏻🙏🏻

لكن علشان نفوز بيها يبقي لازم منغلطش غلطاتنا في كأس العالم .. يعني ياريت نعزل منتخبنا عن الي بيزورهم الفجر علشان يتصورو مع اللاعيبة 


هتستغربو ان بطولة زي دي ممكن تبقي بداية انفراجه وانفتاح وتعاون وثقة بين المصريين


البطولة دي لمصر مش للنظام ، نجاح تنظيمها والفوز بكأسها لمصر وشعبها كله مش بس لحكومتها


مكاسب اقتصادية و سياحية ورياضية كبيرة 

فرحة محتاجينها بعد سنين مش عارفين نفرح


حماس ورا منتخبنا مبيفرقش بين سن ولا دين ولا لون ولا توجه سياسي ولا ولد او بنت 


الفرصة دي مهمة ان الدولة تستغلها في رأب الصدع السياسي والشرخ الاجتماعي بين المصريين 

وتستفيد من الحدث ده لسعادة المصريين وميكونش حجة لتخويفهم او تحميلهم اعباء جديدة


ممكن تعتبروه زي مشروع قناة السويس وارفعو معنويات الشعب الي شايل فاتورة الاصلاح الاقتصادي والاختناق السياسي والارهاب 


خلونا كلنا نشجع مصر وشعب مصر

تسجيل الايميل

شارك وفكر معانا وابعت تدوينتك