تفتكروا "طلعت حرب" لو رجع هيعملنا ايه ؟؟

574

طلعت حرب راجع 

 ده اعلان ظهر في مصر من شهر تقريبا، واتردمت بيه شوارع المحروسة، هو الاعلان ملوش علاقة بالكلام الجاي، بس تخيلت وانا بكتب ان طلعت حرب "باشا" لو عايش وشايف وضع الاقتصاد المصري كان قطع شرايينه !

اعلن البنك المركزي إمبارح رفع سعر الفايدة ب 2%، وطول اليوم فضلت اقرا تعليقات الناس على السوشيال ميديا عشان افهم ده معناه ايه، ولاني مش خبيرة في الاقتصاد قررت أسأل صديق ليا بيشتغل في بنك، الراجل تعب معايا جداا عشان يفهمني، وياريتني ما فهمت احنا  داخلين على ايام سودة، رفع سعر الفايدة ليه توابع عامل زي الزلزال كده يزلزل الأرض ويهد الدنيا فوق دماغنا

 منها مثلا ان دين الدولة للبنوك زاد، يعني ايه الكلام ده؟! يعني الدولة اصلا مديونة للبنوك ب 3 ترليون يعني 3 وجنبها 12 صفر، فالدولة الى مديونة بالرقم الخرافي ده رفعت سعر الفايدة فدينها زاد عليه 60 مليار جنيه يعني 60 وجنبها 9 اصفار

بالنسبة للشركات الكبيرة الي هي كمان بتاخد من البنوك سعر الفايدة زاد عليها فعشان تعوض الفارق دة هتزود الأسعار وزى ما كلنا عارفين اسعار زادت = مواطن بينطحن، يعني شركة بتبيع مثلا حديد تسليح هتزود سعر طن الحديد وبناءا عليه هيزيد سعر العقارات، وده مجرد مثال قيسوا عليه كل حاجة في حياتنا بنشتريها

 سعر الفايدة مش مؤثر بس على الدولة والشركات الكبيرة الي في الاخر بردو بتأذي المواطن العادي، لا كمان هتعمل كارثة تانية ان الناس اللى بتفكر تعمل مشاريع هتشوف ان ، ليه اعمل مشروع مش عارف هيكسب ولا يخسر في ظروف البلد الملخبطة دي، فليه اجيب مكان وادفع ايجاره واشغل عماله واشتري خط انتاج  وادفع ضرايب وتأمينات ورشاوي لمدام سعاد واستاذه ابتسام ووووو لما ممكن احط فلوسي في البنك واخد فوايد كل شهر وانا قاعد مأنتخ وباكل بطيخ ؟! وطبعا ده بيموت الاستثمار وبيزود البطالة 

الحكاية ببساطة ان الحكومة ماشية بمبدأ عندك تضخم ارفع سعر الفايدة زى عندك صداع خد اسبرين معروفة يعني

 في النهاية احب ابشركوا اننا داخلين على أيام سودة 

وطلعت حرب لو رجع هيبقى لسبب واحد بس"....." ويرجع مكانه تاني

تسجيل الايميل

شارك وفكر معانا وابعت تدوينتك