ذكريات عن قانون التظاهر بعد 4 سنوات

822

زى دلوقتي من 4 سنين صدر قانون التظاهر, وقتها كانت كل المخاوف بتتحقق, والبراح كان بيضيق كل يوم عن أول من بعد 3 يوليو.


فاكر لما الاخوان حاولوا يصدروا القانون في 2012 الكل انتفض وقتها,  ساعتها قولنا لن نسمح باصدار قانون ليمنع التظاهر, وإزاي رئيس  جاى بعد ثورة ومظاهرات عايز ينهي المظاهرات والتعبير عن الرأى.


زى دلوقتي من 4 سنين تم القبض علي مجموعة كبيرة من المشاركين في المظاهرة امام مجلس الشورى اللى كانت ضد مواد المحاكمات العسكرية  فى الدستور.


اتحبست أنا وعلاء وقتها بتهمة التحريض علي مظاهرة الشورى, وبعدها خرجت من قضية مجلس الشورى واتعملت قضية جديدة بعنوان التظاهر والشغب أمام محكمة عابدين.. وضافوا فيها عادل ودومة.


 


وقتها كان فيه أصوات كتير مؤيدة لقانون التظاهر.. أصوات يفترض انها ليبرالية أو مدنية... شخصيات كان يفترض انها فى معسكر الحريات والمدنية زايدت وخونت كل من رفض قانون التظاهر وقتها.. لولا هذه الاصوات  ولولا تأييدها للقانون وقتها ما كان لهذا القانون أن يرى النور.


 


قالولنا انتوا كده بتدافعوا عن الاخوان.. .. ماتحطوش نفسكم معاهم.. سيبوهم يخلصوا علي الاخوان وبعد كده كل حاجة هاتبقى كويسة.


قولنا مش بنحط نفسنا مع الاخوان, والموضوع مش موضوع اخوان. مش دفاع عن الاخوان.. لكن دفاع عن مبدأ...  بيقولوا ان قانون التظاهر علشان الاخوان لكن واضح انه  علشان يخرس الكل.. بيقولوا ان قانون التظاهر علشان منع الارهاب.. لكن واضح انه لإرهاب أى حد يحاول يعترض في يوم من الايام.


قالولنا  وقتها بطلوا دوشة واستنوا مجلس الشعب يعدل القانون.. قولنا وهو من امتى مجلس الشعب بيعرف يعدل قانون, خصوصا ان كان قانون مفروض من فوق, وكمان بالمنظر ده مش هايكون فيه مجلس شعب حقيقي.


آفة التخوين والمزايدات..


 


في رأيي المتواضع إن التخوين والمزايدات هم العدو الأول لأي شيء في الدنيا, وهم السلاح اللي تم استخدامه لتفكيك أي شئ, وهم اللي وصلونا للي احنا فيه دلوقتي.


لسه مش ناسي المجموعات اللي كانت بتظهر فى الايام دى وكانت بتقوم ببتزايد على الكل وتخوين كل الناس  وكل شىء , لسه فاكر المجموعة اللى ظهرت لافتعال مشاكل عند قسم القاهرة الجديدة ليلة  27نوفمبر , هل فعلا كانوا مزقوقين زى ما كان بيتقال لإفشال كل شىء بشكل متعمد؟ ولا كان سلوكعدائى تلقائى؟ ولا  كان بيبقي بسبب معلومات مغلوطة أو بسبب مشاكل شخصية أو نفسية , ولا فقط الكراهية  والشخصنة هى اللى بتحكمهم


أو المجموعة اللى ظهرت لإفتعال شجار أمام محكمة عابدين  وتم الاستعانة بما فعلوا كدليل ادانة ادى للحكم عليا انا ودومة وعادل بالسجن 3 سنين حبس مشدد+ 3 سنوات سجن بالمساء(مراقبة).


لسه بسأل نفسي .ز هل دول كانوا صدفة؟ طب هل اعتذروا عن التخوين والمزايدات وانهم كانوا آداة لترديد نظرية المؤامرة وفى التشكيك فى كل شىء؟


 


4 سنين مرت على صدور قانون التظاهر, اتحبس آلاف على خلفية القانون, المظاهرات تقريبا اختفت, لكن الارهاب بيزيد.. لإن الارهاب مش محتاج مظاهرات , الارهاب محتاج عقلية منغلقة, محتاج مشاعر كراهية, محتاج  جهل , محتاج  فتاوى وتفسيرات من مئات السنين.


4 سنين مرت على اصدار قانون التظاهر بحجة الاستقرار وعجلة الانتاج , لكن  الانتاج متوقف بسبب الفساد وسوء الادارة  والقوانين المتخبطة مش بسبب المظاهرات.

تسجيل الايميل

شارك وفكر معانا وابعت تدوينتك