"شريف جابر" يطلب تبرعات لشراء جنسية جديدة

556

مبدأياً اللي ميعرفش شريف جابر فهو شاب مصري، بدأ يعمل فيديوهات من حوالي سنتين، بيدافع فيها عن حقوق المرأة، حقوق المثليين، حقوق السياسين.. وفيديوهات أخرى تنتقد الأديان وتكذبها.. 


عنده عدد كبير من المتابعين خارج وداخل مصر، لكن مش كل متابعينه يتفقون معه في إراءة بالتأكيد ولكن في النهاية نقدر نعتبره شخصية مشهورة علي سوشيال ميديا على الأقل.. 


وطبعاً زيي اي شاب عايش في مصر وبيعلن اختلافه بدون حذر او تخفي، شريف اتقبض عليه واعتقل اكتر من مرة واتمنع من السفر وتم التحفظ علي باسبوره


شريف عمل فيديو من يومين وضح فيه وضعه، ووضح فيه انه كل مره كان بيخرج من مشكلة كان غالباً بيدفع فلوس أو بيطلع بالحب أو بيتسلوا عليه شوية ويسيبوا.. 

المهم انه في نهاية الفيديو شريف كان حكي وعرفنا كل الطرق والمحاولات الي عملها عشان يسيب البلد وينقذ نفسه ويحصل علي حريته قبل ما يتم اعتقاله تاني ومعرفة مكانه، مع العلم انه بيغير مكانه كل فترة قصيرة عشان ميتقبضش عليه تاني بسهولة.. 

وكانت المحاولة الأخيرة لدي شريف هو انه يطلب تبرعات من متابعينه بقيمة 100 الف دولار عشان حسب كلامة يقدر يشتري جنسية من دولة دومينيكا ويتنازل عن جنسية المصرية فا بالتالي يقدر يسيب البلد.


في المواقف اللي زيي دي بحاول على قد ما اقدر اقف عند الحيادية واحط نفسي مكان الشخص اللي طالب المساعدة.

ايه اللي يوصل شخص انه يطلع يطلب فلوس من الناس الا لو هو فعلاً وصل لدرجة اليأس والخوف..

لكن هل شريف جابر فعلاً أحق واحد بالتبرعات والفلوس الي هتدفع له؟ ولا هو بس عشان قدر يوصل صوته ومعروف بشكل لا بأس به فا هيستغل دا في الحصول علي مساعدات وفلوس.. 

طب ايه المشكلة اما شخص ما يستغل وضعه في انه ينقذ نفسه؟ هل لو كنا مكانه مكناش هنعمل زيه؟ 

في شباب كتير معتقلين ومحبوسين بقالهم سنين ومعندهمش فرصة يهربوا من البلد ولا يلموا تبرعات ولا يتنازلوا عن جنسيتهم ويسافروا، بس هل دا معناه اننا مش هنتعاطف مع الشخص ونبدأ نساعده الا بعد ما يعتقل ويتقبض عليه


حتى لو شريف بيستغل شهرته او متابعيه لجمع تبرعات والهروب من مصر، فهو في الأول والآخر لم يأذي احد بفيديوهاته، حتي وان كنت اعترض معاه على بعض الآراء لكن مازال لم يعرض أحد لأذي إطلاقاً، ومازال له الحق في طلب المساعدة خصوصاً انه اللي هيتبرعه هيكون بيتبرع بأرادته مش مجبر ولا مغصوب.. 


أكيد في اشخاص كتير علي هذا الكوكب يستحقوا المال والتبرعات والمساعدات أكتر من شريف، لكن شريف هو الي قصاد منا حالياً وهو اللي بيستنجد بالناس حالياً وبيقول انه في خطر ومحتاج إنقاذ، فمعتقدش انه كل مره حد محتاج هيجي يطلب مننا مساعدة امفروض نقوله استنى اما نشوف مين محتاج اكتر منك، لو مفيش حد محتاجها اكتر ساعتها نبقا نعيد تفكير ونقدملك المساعدة.. 

مظنش انه الموضوع بيمشي بالطريقة دي ومظنش برضه انه في سبب لمهاجمة الناس لطلب شريف بالتبرع غير انهم كارهين شخصه بناءً على المحتوى الي بيقدمه في فيديوهاته مش لأي سبب تاني.. 


بتمني بس منكتشفش في يوم انه شريف نصاب أو أن التبرعات دي اصلاً لسبب آخر غير المعلن، زيي ما في مشاهير كتير طلبوا تبرعات لاستكمال دراستهم وسفرهم وفي النهاية طلعوا مكنوش فعلياً محتاجينها بس برضه بتمني منحكمش علي الناس بناءً علي تجارب ناس تانيه ونكتشف في النهاية أننا كان في أيدينا ننقذ شخص ومعملناش دا بسبب حكمنا الخطأ..

تسجيل الايميل

شارك وفكر معانا وابعت تدوينتك