وسط البلد

412

امبارح فجأة اتملي التايم لاين كله بهاشتاج تريقة عن ( وسط البلد) و اتحول الموضوع لتريند ، كله بيحكي و يتحاكي فية جزء شايف إنه من حقة يعرض طريقة اعتراضه عن التجاوزات ( من وجهة نظره) اللي بتضايقه في قعدات القهاوي (دواير وسط ناو)

و الجزء التاني شايف انه ممتن للمكان دة و انهم مش من حقهم يهاجمو المكان بالطريقة دي و بعضهم قال يساوي خلافاتهُ الشخصية مع ناس تانية و يلا كل بتوع وسط البلد ناس وحشين  و و .. الخ 

 شوية منهم شايفين إن بعض الناس اللي بتدون و بتتريق هما بيدونو افعال هما نفسهم بيعملوها و في ناس ابتدت تنظر و تتريق علي افعال كتير في نظر ناس تانية دي حرية شخصية و مش من حق اي شخص انهُ يقلل من افعال البعض ( تحت اي بند) .

و من هنا ظهرت خناقة جديدة زي اي تريند بين الرأي و الرأي الأخر .

هو احنا لية معندناش ثقافة احترام رأي الآخرين حتي لو دة بيتعارض مع رأيك الشخصي ؟!

لية حتي الناس اللي بتنادي بالحريات مش مؤمنة غير برأيها و أي رأي متعارض مع افكاري ، هو رأي ملوش اي تلاتين لازمة و بالتالي يا ههاجمك يا اما هقلل منك و هعتبرك شخص متخلف و افكارك افكار رجعية ...

مش فالتريند دة بس السوشيال ميديا للآسف اتقلبت لساحة معركة مين هيقدر يثبت للتاني إن رأيه صح و مين أكتر واحد هيهاجم التاني و يتفلسف علية .

إنك تعرض حاجة مضايقاك بشكل كوميدي لطيف علي صفحتك الشخصية اعتقد مفيهوش اي تجاوزات خالص و حتي المناقشات المحترمة اللي بنعرض فيها اختلاف وجهات النظر شئ صحي جداً ، لأن ببساطة الأنسان وارد جداً يتخلي عن افكاره بناء علي اكتساب معلومات من مصادر تانية مختلفة.

بس للأسف تحول اي تريند لخناقة علي السوشيال ميديا و الموضوع بدل ما كان نوع من انواع الكوميديا و الضحك قلب و كأنها حرب بين شقين محدش عارف مين الصح و مين الغلط !!

اياً كان السوشيال ميديا عالم افتراضي بنفصل فية عن زحمة الدراسة و الشغل و غيره بننقل فيها احياناً جزء من افكارنا و بنشاركها و احياناً بتتفتح ابواب النقاش و الجدال بإختلاف طرقهُ  مش مجال خالص لمين يطلع التاني غلطان قبل التاني!


وسط البلد المكان اللي عاصر ثقافات مختلفة، و حكاويها و شوارعها و قهاويها شهدت علي احداث كتير مختلفة ثقافية و سياسية  ، اغلبنا مهتم بالمكان كتراث و ارض كانت ملجأ لناس كتير ، اي مكان في العالم طبيعي يبقي فيه تجاوزات كتير منبوذين اجتماعياً و طبيعي يكون فيه المُدعين و الكدابين ، بس المتفق عليه إننا بشر و لينا عقول احنا اللي بنختار مبادئنا و دوايرنا و افكارنا، مفيش مانع من الكوميديا و التريقة و مفيش مانع من اعتزازك بالمكان حتي لو فيه تجاوزات مش مقبولة و ظواهر مبتعجبكش حقك تعبر عن دة  ، بس الغريب و الغير منطقي بالمرة إن الموضوع يتحول لخناقة بين طرفين. 

هي مش حرب للآسف .

تسجيل الايميل

شارك وفكر معانا وابعت تدوينتك