أنا شاركت في محمد محمود

769




كنت دايما نفسى أنزل واشارك  فى الثوره من أولها  بس لظروف  خاصه  بيا مشاركتش. . بس  نزلت بعدها  لفتره كبيره  وحسيت  انى روحى  اتخلقت  من جديد وأحداث  كتير مرت ونزلت  فى محمد محمود أعظم  حدث فى الثورة ..شميت  الغاز  .روحت أساعد المصابين فى مستشفى  الكنيسه اللى جنب  المسجد  .. شوفت الدم اللى سال فى الشوارع .. وكلام  أثبت مكانك .. إسعاف  .. حاسب  فى بنت معدية  .. تعالى هنا مدخليش  جوه .. سيبنى  يا وليد .. هات طوبه .. أثبت  مكانك  .. حاسبى  هتتصابى. . دم الشهداء  محاوطينه  بطوب. . شارع العيون  هيفضل  شاهد على اللى باع  واللى غدر. . هيفتكر  كل شهيد مات غدر. . محمد محمود كنا فيه واحد ضد عدو مجهول  للإعلام  ومعروف لينا .. انا شاركت  فى محمد محمود


تانى يوم نفس غيمة  الغاز  فى كل مكان. تعالى هنا رايحه فين ..عايزه اشوف صحابى  هناك .. هتتضربى  لا ..استنى  لا ..خليك يا وليد دا كان صاحبى  اخد خرطوشة  فى رجلة. . خليك انت عشان حمزة  ابنك .. هروح مش هتاخر .. خدى  ماسك .. طيب طيب .. واروح  هناك والاقى حد يقولى  حاسبى  ارجعى  ورا  .. لا هطلع  كمان .. واحس بدوخه  والاقى  واحد ميعرفنيش  يسندنى  .. واطلع  اشرب حاجه وادخل  اكتر  والاقى واحد عنيه  غرقانه  دم جدع ياباشا  نشنت  فى عين الجدع .. بس عارفينك  ومش ناسينك  .. أثبت مكانك  .. حاسب  عدى  التروسيكل  .. فى مصاب .. محتاجين دم وقطن وشاش  نادوا  ع الدكتور  اللى جنب كنتاكي  بسرعة  .. خد بالك  متعديش  ع الدم. . دا دم أنقى  ناس .. جدع يا باشا  نشنت  صح  .. محمد محمود محفوره  فى قلبك كل واحد شارك فيها وبالنسبالك  غير اى حد فى الثوره .. هتفضل فى قلب كل من شارك فى ثورة يناير العظيمه. . اوعوا تنسوا  كانوا ديابه  وكنا وحوش

تسجيل الايميل

شارك وفكر معانا وابعت تدوينتك