نسوية ولا مش نسوية

252

 أنا بكتب الكلام ده وعارفه ان اغلب صحابي البنات (النسويات) هيزعلوا مني واحتمال ان حبه منهم يتهموني اني جاسوسة مزقوقة عليهم من الرجالة او عميلة مذدوجة والله يا جماعة انا لا عميلة ولا جاسوسة وزيي زيكوا مؤمنة جدااا بالمساواه وضد الذكورية الى بيمسارها المجتمع والرجاله علينا بس كمان انا ضد التطرف التطرف بمعناه الشامل مش التطرف الديني لأن اى فكرة ممكن يبقى فيها تطرف انا بقى لا مع ان الراجل يكون مستبد ويفضل يؤمر ويشخط وينتر ولا كمان مع الست الي فاكرة انها لو عملت كباية شاى لجوزها تبقى كده عبده وخدامه عنده ولازم تثور ضده وضد المجتمع الظالم الى خلاها عملت كباية شاى غصب عنها الفكرة ببساطة اننا عايشين في حياة صعبة وعشان نكمل ونستمر رغم كل الظروف الاجتماعية والسياسية و ( الاقتصادية) وركزوا اوي في اقتصادية دي محتاجين اننا نؤمن الاول ان الحياة مشاركة وان مفهاش حاجة خالص لو وقفنا فى المطبخ سوا اهو فرصة نرغي مع بعض ونحكي عن الى حصل في يوم كل واحد فينا مفهاش حاجة والله لو سي الاستاذ وقف يقطع السلطة كده وهو بيرغي ده مش هيقلل من رجولته حاجة ومفهاش حاجة كمان لو طلب منك كباية شاى وهو بيشوف ماتش برشلونة مع الارسنال الدنيا مش هتتهد ولا معنى طلبه انة بيلغي شخصيتك الموضوع ابسط من كده مش لازم تكتبي بوست على الفيس تنوحي فيه وتعملي منشن لصحباتك النسويات ويدخلوا يعترضوا ويطلبوا منك انك تعملي ثورة في البيت ومش بعيد الموضوع يوصل لقطع الطريق بين الصالة والحمام وكهربة التلاجة وعمل هاش تاج #مش_هعمل_شاى_أنا_مش_خدامة والموضوع يتحول من كباية شاى لثورة عارمه وناس مع وناس ضد واعلان احكام عرفية في البيت خلينا نبسطها ثوري على اوضاع غلط خدي موقف لو أهانك طالبي بحقوقك ان يكون ليك رأي انك متربيش الولاد لوحدك وان السوق مش مكتوب عليه للنساء فقط زى عربية المترو اطلبي منه يذاكر للعيال معاكي بدل ما تتشلي لوحدك تتشلوا سوا والله فيه حاجات اهم ممكن تتخانقي عشانها وبلاش خناقة كباية الشاى دي الهي يسترك.

تسجيل الايميل

شارك وفكر معانا وابعت تدوينتك