وطني الحبيب مصر !!

458


بحس أوقات كتير بصعوبة في تحمل أني أعيش و أنا عارفه ان حد بحبه معرض كل يوم وكل لحظة من أنه يحصله حاجة سواء مرض أو موت ، الخطر بوجة عام و الخوف اصبحوا إحساس مصاحب ليا في كل وقت ، وكأن الموضوع ده كان قرب يبقي مرض نفسي عندي بس قدرت اتغلب عليه بدون أدويه أو علاج نفسي قدرت أعمل ده لوحدي بشوية محفزات و تفكير إيجابي  ، وأنا في الأصل الطابع الغالب في شخصيتي الإيجابية أكتر مستحيل شئ يخوفني لكن في الأونه الاخيره بعد أن فقدت الكثير من الأشخاص العزاز علي قلبي بقي ينتابني القلق و الخوف ، خوف أني ممكن أفقد شخص تاني أقرب ألي قلبي أكتر .


وطني الحبيب مصر  أنا عارفه أن مفيش شئ مستحيل وأن كل حاجة ليها حل ، الموضوع كان ابتدي يسوء عندي من بعد ثورة 25 يناير المجيده و قد أيه شايفه خطر كبير على وضع مصر السياسي و الاقتصادي و ابتدي يبقي عندي حب تاني كبير في حياتي أسمه وطني الحبيب مصر ، حب وطن يعني تعب بقى وحرق أعصاب 24 ساعه تغير رئاسي ، يقولك كانت ملكيه بقت جمهوريه ، عسكرية ، مدنية ، ليبراليه ، وأصلا في ناس كتير عايشين في حزب الملوخية ، مش مشكلة كل ده المشكله في وسط كل ده في أوجاع كتير مرض وفقر و جهل ، بيعرضني أنا كمواطنه لخوف ورعب كل يوم وكل لحظه علي مستقبل اخ صديق حبيب .


بالتالي حملت كل مشاكل الوطن دي بالتبعيه لمؤثرات الحياة الخارجية ، تيجي صديقتي فلانه تقولي انا سيبته ومش قادره أكمل معاه ده دماغة ذكوريه جدا ، بيصبح تحليلي الشخصي دي نتيجة التعليم في مصر والعادات المكتسبة لأننا بقينا نهتم بالتعليم الأساسي العقيم ونسينا كلمة أخلاق .


بعدين مثلا أعرف ان فلان و فلان في العيله جاله كانسر او ورم يبتدي عقلي تلقائياً يترجم أن اه مصر وطني تعبان بالتالي الأعضاء الساده المبجلين مواطني مصر أم الدنيا هيتعبوا زي إنسان مثلا مريض سكر و ضغط و قلب أكيد هتلاقي اعضاء تانيه في جسمة بتتهالك مع الوقت طبيعي .


 يعني اللي كان بيصيب الطبقة البسيطة من الفقراء والمساكين أصبح يصيب حالياً الطبقة الوسطى و بعدين هتبقي العليا "كريم شانتي" المجتمع و هكذا ... لحد ما يصبح المجتمع كله مريض بمرض الكانسر و ده الخوف اللي بيرهبني كل يوم في فترة ما. 


 لما كان شخص يحصله حادث مرير علي طريق يتوفي و أعرف أن اللي تسبب في الحادث  ده متحاكمش وأهله مقدروش ياخدوا حق فقيدهم كنت أقول اه ده عشان مصر عيانه معلش مصر بكره تخف وتبقي أحسن .


بكره ده هيكون أمتي و بإيد مين مش عارفين بس بكره كلنا هنخف و مصر هتخف معانا أزاي معرفش ، بس اكيد حقنا نحلم نحلم بوطن أحسن أقوي عنده مناعة قويه وطن من غير مرض و لا جوع ولا طبقات اجتماعيه متفاوتة وطن صحتة سليمه وبنيانه قوي و طن كل عضو فيه واخد حقه كويس ، وطن متوفر فية العدل و كلمة الحق يمكن ساعتها أبطل أخاف علي كل اللي بحبهم و احب الناس من غير ما أخاف من بكره ولا أخاف عليهم من اي حاجه ممكن تحصلهم ، يبقي فعلا قدر مش من إهمال وطن

تسجيل الايميل

شارك وفكر معانا وابعت تدوينتك